सामान्यतया  Land Pooling भन्नाले कुनै सरकारी वा गैरसरकारी परियोजना अन्तर्गत नमिलेको वा टुक्रामा रहेको जग्गाहरु एकीकृत गरेर आफ्नो उदेश्य वा स्वार्थ अनुरुप पुनः विभाजन वा खण्डीकृत गरि उपयोग, वितरण वा बिक्रि गर्नु बुझिन्छ । व्यवस्थित वस्ती वा आधुनिक सहर विकास गर्ने यो सबै भन्दा उत्कृष्ट विधि हो । क्रमिक सुधारको आधारमा गरिने विकास यो विधिबाट गरिने विकास संग तुलना योग्य नै हुँदैन । व्यवस्थित पूर्वाधार विकासका दृष्टिकोणले Land Pooling बाट पाँच बर्षमा हुने उपलब्धि क्रमिक सुधार बाट पचास बर्षमा पनि प्राप्त गर्न सकिदैन । सहर निर्माण तथा बजार विस्तारका लागि भूमि व्यवस्थापनको यो उत्तम विधि हो ।
Land Pooling गर्दा आवश्यक सम्पूर्ण जग्गा परियोजनाको स्वामित्वमा प्राप्त भै सकेपछी उद्देश्य अनुसार नक्सांकन गरेर (बाटो, ढल, खुलाक्षेत्र लगायतका आवश्यक सबै पुर्बाधार निर्माणको लागि प्रयाप्त जग्गा छुट्याएर) बाँकि जग्गा समानुपातका आधारमा फिर्ता, वितरण वा बिक्रि गरिन्छ । यसो गर्दा करिब चालिस प्रतिशत जग्गा सार्वजनिक जग्गामा परिणत हुन्छ भने साठी प्रतिशत जग्गा फिर्ता, वितरण वा बिक्रि गरिन्छ । यो परियोजना सुन्दा अत्यन्त जटिल र विवादित लागेपनि साधनहरुको सहि प्रयोग गरेर सहज र सौहार्दपूर्ण तरिकाले कार्यन्वयन गर्न सकिन्छ । यसबाट सुबिधासम्पन्न वस्तीको विकास हुन्छ र जग्गाधनीले सोचे भन्दा राम्रो मूल्य प्राप्त गर्दछन ।